Skip to the content
}

Sámi girjjálašvuohta: Dál álgá árgabeaivi

Paul S. Amundsen

Publiseringsdato:

29.10.2019

Makkár luottaid lea guođđán sápmelaččaid historjá vealahuvvon unnitlogu álbmogin sámi girjjálašvuhtii? Ja man guvlui lea nuorra, sámi girjjálašvuohta jođus?

Les artikkelen på norsk.

Read the article in English

Go LitFestBergen rahppo nuppádis sámi álbmotbeaivvi guovvamánu 6. beaivvi, lea sáhka sámi girjjálašvuođas – ja árgabeaivvis.

Okta váldonamain dán jagáš festiválas lea 29-jahkásaš násti Niillas Holmberg, gii dadjá iežas leat eret “Sámis, man Suopma lea okkuperen”. Ná nuorran son lea jo ožžon bálkkašumiid ja lea jorgaluvvon máŋgga gillii. Lassin leat poehta, neavttár ja musihkár, Holmberg lea maiddá guovddážis mielde rahčamin álgoálbmotvuoigatvuođaid ovddas.

Maiddá Risten Sokki, gii lea Norggabealde eret, ja gii lea čállán sihke divttaid, noveallaid ja mánáidgirjjiid, boahtá Bergenii guovvamánus. Vuosttas diktagirjjis Bonán, bonán soga suonaid, mii evttohuvvui Davviriikkaid Ráđi girjjálašvuođabálkkašupmái 1998, son čállá ee. máttarádjás birra, gii lei okta jođiheaddjin Guovdageain-stuimmiin 1852:s. Su ođđasemos noveallačoakkáldaga lea Laila Stien dál jorgaleamen dárogillii. Laila ieš gullá Norgga beakkánemos noveallačálliid gaskii, ja son maiddá searvá LitFestBergenii. Festivála lea hui ilus almmuhit Sigbjørn Skådena oasálastima ge. Sigbjørn čállá sihke sáme- ja dárogillii.

Ii leat guhkes áigi dassá go sápmelaččat ledje čájáhus-gálvun. Muhto doallá go deaivása ovttabealat govvideapmi dainna vásáhusain mo sápmelaččat ieža dovde ášši? Dutki ja čálli Cathrine Baglo lea ožžon olu fuomášumi girjjis ovddas čájáhussápmelaččaid birra, ja son boahtá LitFestBergenii logaldallat ášši birra iežas girjji vuođul.

Duohtavuođa- ja soabadankommišuvdna sápmelaččaid, kveanaid ja norggasuopmelaččaid várás, man ráđđehus lea nammadan, lea álggahan barggus. Muhto mii duođaid dárbbašuvvo dasa ahte ásahit luohttámuša olbmuid gaskii maŋŋil máŋga čuohte jagi gičču ja vealaheami? Ja makkár doaibma sáhttá girjjálašvuođas leat diekkár proseassas? Harald Gaski, gii lea sámi kultuvrra ja girjjálášvuođa professor Sámi allaskuvllas, boahtá LitFestBergenii, ee. deaivvadan dihtii máttaafrihká girjjálašvuođa professorin Njabulo Ndebeliin, ságastallat jussa ja dáidaga doaimma birra soabadanbarggus.

Del Innhald